Түркістан облыстық мүгедектерге арналған «Сауран» спорт клубы» КММ ұжымында келелі кездесу өтті. Басқосуда мекеме директоры Абай Қазиев спорт клубтың жарты жылда жеткен жетістігін атап өтті. Сондай-ақ, Алматыда 15-22 маусым аралығында пара жеңіл атлетикадан өткен ҚР чемпионатынан олжалы оралған спортшыларды құттықтады. Облыс намысын қорғаған спортшылар ел чемпионатында 13 алтын, 5 күміс, 3 қола медаль алған-тын.
«Әрбір жетістігіміз бапкерлер мен спортшылардың еңбегі. Атқарылған жұмыстар аз емес, дегенмен жұмысты ширата түсуіміз керек. Барлығымыздың мақсатымыз бір — ол Түркістан облысының пара спортын дамыту. Сондықтан, оқу-жаттығу жиынын өткізу мен жарыстарға бару қаражатын, қажетті құрал-жабдықтармен қамту өз деңгейінде атқарылады», – деді Абай Ізтілеуұлы.
Директордың тәрбие ісі жөніндегі орынбасары Бақкелді Қалыбековтің айтуынша, спорт клубтың 2 спортшысы облыстық дене шынықтыру және спорт басқармасы тарапынан үздіктерге берілетін (стипендия) алатын болады. Темірбек Тоғанбай мен Мұхан Айтмырзаев – жеңіл атлетикадан тірек-қимыл аппараты зақымданған және көру қабілеті төмен спортшылар арасында өткен ҚР чемпионатының 1-орын иегерлері.
Келесі кезекте мекеме әдіскерлері — Марат Нұрмаханов, Дастан Мұсаханов және Нұрдәулет Шарбеков 6 айдың қорытындысы бойынша есеп берді. Марат Биданұлының сөзінше, жарты жылда спортшылар 15 алтын, 12 күміс, 8 қола медальға қол жеткізген. Басқосу соңында жаттықтырушылардың ұсыныс-пікірлері де ескеріліп, үстел теннисінен өтетін «Сауран» клубының ашық біріншілігін ұйымдастыру барысы талқыланды.
Нұртас КЕҢЕСБЕКОВ.
